سنة وثانية
يومنا بقى ساعة
و الساعة بقت ثانية
وانسى حكاية الاسبوع و الشهر والسنة
تاريخ مضى كان اليوم فيه سنه
كله بركة وسعادة وهنا
تاكل وتشرب وتنام و تزورك احبابك
وتصلى وتلعب كمان
وساعة حظ..دى كانت زمان
قالوا انها ماتتعوضش
بعد ما بقت الساعة ثانية
ضاع معاها الحظ وعمره ما يجى فى ثانية
شالين ساعات فى ايدينا...زينة
ليه؟.حسرةعلى الوقت اللى ملوش قيمه
زمان كان الوقت من ذهب..لما ذهب
قلت حليتهم وقعدوا يندبوا الحظ اللى فاتهم
ياناس حرام عليكم..دى الايام هى الايام
و الشهور عند الله اثنى عشر فى كتاب الله
ارجعوا للكتاب ورب الكتاب
ترجع لكم الايام احسن مما كان

يحكى ان

كان ياما كان فى سالف العصر و الاوان بلد جميل اسمه مصر.قالوا عليها ام الدنيا.كانت دنيا غير الدنيا وناس غير الناس. لا الدنيا عادت دنيا و لا الناس بقوا الناس.اتغيرت الاحوال.الحب كان معشش على الكل..الانسان والحيوان والجماد.النيل يعطف على الارض والزرع و الحيوان وكله يعطف على الانسان.الانسان من حبه لنيله يهديه كله سنة هدية. عروسة بنت بكرجميلة يزينوها بأحلى و اغلى زينة.لما الحب قل بقت العروسة قش والزينة بكش وغش.النيل كريم اصيل سقى اهله من كرمه واصلته ولكن الميه جريت فى دم خسيس لا يعرف فضل ولا جميل.فضل النيل يوجود عليهم لحد ما افتكروا انه من حبه فيهم لازم يديهم..ده اكتر من كده قالوا ايه السرف ده دالبحر بيأخد اكتر ما النيل بيدينا.ايه الحل؟هو فاكر انه يقدر يمشى على كيفه لازم نوقفه عند حده علشان يعرف قدره.واحد نبيه قال نسد عليه الطريق..و بنوا سد عالى.وقالوا خلاص ما فيش ميه حتروح البحر عيزين نشوف النيل حيعمل ايه؟ النيل كريم واصيل فضل يجرى زى زمان ولحد السد و قف خيره و داهم ميه بس مش زى بتاعة زمان.مية زمان كان فيها كرم و خير و اخلاق.ورى السد وقفت مية زمان و دلهم ميه هى صحيح شكل الميه لكن مايعة لا تروى ولا تخضر.ماغشهمش..لكنه عرف قدر الئيم اذا اكرمه.ومن يومها لعادت الناس ناس..و كل شىء مات الارض والزرع والحيوان حتى الاحساس.يــــــــــــــــــــاناس